Nervioso pa bo prome dia di scol? 5 tips pa mayor

Nervioso pa bo prome dia di scol? 5 tips pa mayor

Tanto alumno, docente y mayor por ta nervioso riba e prome dia di scol. E anticipacion pa e comienso di aña escolar ta grandi. "Mi ta spera mi klas tende for di mi", "E juf lo ta hopi streng?", "Mi yiu lo fit in na su scol nobo?" y hopi preocupacion mas. Tin ora e preocupacion of nervio por ta extremo y ta tuma forma di ansiedad. 5 tips con abo como mayor por yuda bo yiu cu esaki:

1. Importancia pa atende scol sin falta

E prome factor ta cu abo como mayor ta compronde e importancia pa bo yiu atende scol. Scol ta ofrece bo yiu diferente oportunidad pa crece y desaroya tanto riba tereno di educacion y social. No laga bo yiu keda cas sin rason valido. Esaki por causa cu e ansiedad pa bai scol ta keda existi y por bira mas pio. Tambe e yiu ta siña kico e mester haci y bisa pa convence abo como mayor cu e por keda sin bai scol. Siña bo yiu cu atende scol ta hopi importante! 

---

2. Combersa tocante su preocupacion

Planea un momento pa abo cu bo yiu por combersa tocante e preocupacionnan cu bo yiu tin tocante su (prome) dia di scol. Splik'e cu ta normal pa ta poco nervioso. E combersacion aki por bai mas fasil si abo cu bo yiu ta bezig cu algo, p.e. cana na Linear Park of durante un wega di puzzel of blokjes. Esaki por facilita bo yiu pa comunica cu bo.  Encurasha bo yiu pa papia tocante su preocupacion, pregunta cu por yuda ta 'kico ta the worst cu por pasa/kico bo ta kere lo pasa?'

3. Papia tocante posibel solucion

Trata di no resolve su preocupacion cu djis un 'no worry/nada no ta pasa/tur cos ta bai bon' pero purba di encurasha bo yiu pa pensa riba diferente forma cu e por atende of resolve e preocupacion cu e por tin.  

4. Role-play & Role model

Role-play diferente scenario cu bo yiu ta ansioso di dje. Por ehempel laga bo yiu actua e 'juf streng' of 'e mucha cu ta tenta' of e scenario pa sera amistad, y abo como mayor ta demostra diferente actitud y reaccion apropia pa e scenario ey (role-model). 

5. Y bo nervionan?

E prome dia di scol por ta un momento hopi ansioso pa abo como mayor, caminda bo ta entrega e cuido y responsabilidad temporalmente over. Sea conciente cu bo reaccion como mayor tin impacto. Si abo ta nervioso bo yiu lo sinti esaki! Encurasha bo mes y bo yiu door di bis'e con great e ta cu e ta bai scol, cu bo ta orguyoso di dje cu e ta haci su best pa bai. Purba di ta alegre y sigur di bo mes. No encurasha/beloon/reward bo yiu su yoramento, protesta of tristesa. Ahn.. y no lubida: bisa 'Ayo' 1 solo biaha.

Si ainda bo yiu tin hopi dificultad pa adapta, papia esaki cu su scol. Docentenan tin experencia pa maneha y yuda muchanan cu esaki. Abo tin mas tips pa calma e nervionan di prome dia di scol? Laga nos sa! 

Un feliz aña escolar Aruba, haci boso best!