Adiccion na wega online

Adiccion na wega online

Awendia un mucha di 4 aña kisas no sa mara su veter ainda, pero e chens ta grandi cu e sa opera e telefon, tablet y computer! Increibel con e capacidad di un mucha ta adapta na tecnologia moderno. Caminda cu no mucho tempo pasa muchanan tawata hunga pafo den cura of den mondi awe muchanan ta yora pa por hunga e wega di computer, tablet of telefon.

---

Tin diferente tipo di wega pero pa mas facil nos ta parti esaki den dos categoria. Un tipo di wega ta esun clasico manera Super Mario, esaki no tin mester di internet y tin un meta specifico; salba e princesa. Manera tempo di Nintendo 64, bo ta keda hunga e wega te ora bo bolter e. 
Un otro tipo di wega ta esun cu ta online multiplayer, es decir cu mester di internet pa hunga e wega cu mas persona rond mundo simultaniamente. Den e tipo di wega aki no tin un goal defini, pues mayoria di nan no tin fin, p.e. e famoso Candy Crush y Minecraft. Un poco mas avansa ta e multiple player online naunda cu tur hungado ta desaroya nan personahe online (un avatar). E tipo di wega aki ta abreva MMORPG, Massively Multiplayer Online RolePlaying Games. Esakinan ta wega manera World of Warcraft.

Den  e articulo aki nos ta bai papia tocante tur tipo di wega cu ta online multiplayer. Na prome lugar mi kier splica cu e wega aki ta ser diseña door di profesionalnan pa motiva hende pa keda hunga y hasta paga pa cierto servicio den e wega manera conosi den Farmville, Candy Crush, League of Legends, World of Warcraft etc., cu un proposito: Placa. Ganashi. Na gran escala. 

Kico nos ta observando awor? Den e generacion actual nos ta mira casonan cu ta mustra di ta adicto na weganan online. Hasta den e area di psicologia tin un debate andando pa por clasifica adiccion na weganan online como un trastorno. Tin diferente clasificacion, nos ta mantene nos mes na tres of mas di e siguiente sintomanan cu por indica adiccion na wega online;

• gran parti di e dia, diariamente, ta dedica na hunga wega online.
• E persona ta preocupa pa bai hunga wega online, esta e ta keda pensa of anticipa p'e proximo wega.
• E persona ta experencia stress y molester inmenso ora cu e no por hunga wega online.
• E persona ta gaña pa por hunga online, p.e. tocante  e cantidad di ora cu e ta dedica na wega online "Ami? T'awo m'a subi online" of "Awe mi no tin huiswerk".
• E persona ta laga responsabilidadnan un banda pa por hunga online, p.e. di scol of trabou, tarea di cas etc.
• E persona ta neglicia su higiena y salud pa por hunga, p.e. keda sin baña, sin come, sin drumi pa por hunga online.
• E persona ta neglicia situacionnan social p.e. cu famia y amistad, nenga di bai come hunto of sali un rato y ta prefera di hunga wega online. 
• E persona ta isola su mes, ta sera su mes den cas/kamber, ta paga telefon etc. 

Otro efecto di hunga wega cronico, es decir tur dia gran parti di dia ta e efecto riba bo celebro. Nos ta mirando muchanan cu sintoma di burnout pa via di tanto hunga wega; no por concentra, depresion, nervioso, no ta motiva, no tin masha emocion, no por of tin dificultad pa comparti tristesa of alegria cu otro hende, ta sinti cu locual nan haci na trabou/scol of na cas no tin sentido, y no ta wordo aprecia of no ta haci un diferencia compara cu locual nan ta logra den nan mundo virtual. 

Esaki ta puntonan hopi importante pa reconose y trata na tempo. Un mucha por medio di wega online ta siña su mente cu manera e logra un meta, e ta haya algo great (un reward). Dibiaha. Pero den bida real no ta asina. Si bo siña bo tafels bon, no ta mane b'a caba di siñ'e bo ta haya bo 10. Bo tin cu traha e proefwerk prome, djey e docente ta bai duna un cifra. Esaki ta tuma tempo. Pasobra cu e mente ta asina custuma cu ta dibiaha e mester haya e 'reward' tur otro situacion manera di scol y asuntonan di cas no ta importante mas, no tin prioridad y no tin ningun motivacion pa haci esaki. 
Y akinan e peliger ta sinta. Mas cu claro no ta tur mucha cu ta hunga wega online ta pasa den locual nos a caba di describi. Asina mes, mayor, sea alerta y structura e cantidad di ora cu bo yiu ta pasa cu su cabes den e mundo virtual. 

---

Naturalmente no ta tur mucha cu ta hunga wega online ta desaroya sintoma caracteristica di adiccion. Hopi ta e mayor cu ta contento cu nan yiu ta paden di cas riba nan machine di wega y no riba caya. Esaki ta e caso di muchanan cu ta hunga wega pa oras den dia, pero cu no ta demostra di ta addicto. E problema ta keda cu e weganan aki ta tuma beslag riba e desaroyo social di e mucha. Tuma nota di e caso di Jhon:

Jhon a cuminsa hunga wega online desde cu el'a haya tino. E tin un grupo di amistad virtual, online, cu ta otro personanan rond di mundo. E ta gusta hunga su weganan y tur momento cu e por e ta online. E mes tin su tablet, computer y un smartphone, kermen hasta den pauze di scol e por score points y level up! Awor Jhon tin 23 aña. Jhon a caba scol pero tin dificultad pa haña trabou. E no ta hopi bon den papia cu hende cu e no conose, cara cara, dus interview pa trabou no ta echt su cos. Jhon ta ripara cu e no ta sintie confortabel ora cu e ta sali den famia of otro asunto social. Poco dia el'a haye forsa na South Beach pa haciment'i aña di un famia. Oef! E no ta compronde kico hende ta haya den para hunto den desordo di musiek pa papia over di kico? Pa respet e la keda un rato, alertando su brothernan cu dentro di 15 minuut e ta jega cas pa subi online y dal un wega. Lagami gaña hari e joke laf cu nan a caba di conta ki. Jhon ta saka su man for di den sako y ta wak su holoshi, ora di yama ayo a yega, e ta dispidi di es'nan rond di dje y cu pep ta cana bai rumbo pa cas, inconsiente di e 'chick' cu tawata purba gara su atencion. 

E caso di Jhon ta un ehempel di un hoben adulto di 23 aña cu capacidad social di un mucha di 12 aña. E ta sinti su mes inconfortabel den situacionnan social, no ta compronde señal comunicativo no verbal y ta caba na isola su mes for di e mundo real. E mesun stress cu e ta sinti ta pon'e bai hunga wega online naunda den su mundo virtual e a establece amistad caba, ta fasil pa e papia cu otro persona den e wega y hasta nan tin nan mes vocabulario cu nan ta custuma di uza (camper, noob, afd, lag, glitch etc). 

---