Den hardin: Jambo

Den hardin: haya sa mas di jambo

Jambo, conoci tambe como okra, ta un berdura masha versatil y kisas tambe controversial. No ta mucho aña pasa cu mi no tawata masha fanatico di sopi jambo. Tur esey a cambia na momento cu nos a dicidi di planta pa nos mes. Di un of otro manera nos a haya simiya di jambo, te cu e'a crece y duna fruta.

Atami ey, 10 pida jambo den man. Big mistake: 

---

No laga jambo bira duro!

Bigger isn't always better den e caso di jambo. Mi a lag'e mucho largo na e mata, keriendo cu mas e crece, mas hopi tin pami come. Un pida taira lo a kauw mas placentero. E next batch di jambo si mi a tene bon na bista y kita esaki na tempo. Awo mi ta percura pa kita e jambo no mas cu 5 pa 7 dia despues cu e bloei. 

Pero kico jambo ta?

Jambo ta un berdura cu por crece den lugarnan calor y seco. Ta sospecha cu e mata tin su origen rond di Ethiopië (1200 aña prome cu Cristo) y cu for di eynan a haci su introducion na otro paisnan. Ta den temporada di esclavitud rond di e aña 1700, jambo lo a haci su introducion den Caribe y Norte America. Aki jambo tawata ser uza pa 'mara' sopi of saus y haci esaki mas diki. Su nomber Arabico ta: Abu-I-Mosk (Tata di musk) pasobra e simiya den estado hecho ta hole 'musky'. Na Ingles e ta conoci como okra y ladies fingers, na Portuges ta quiabo, Italianonan a nombre Gombo y na Papiamento nos ta conoce bou di e nomber jambo. 

Berdura curu

Ok, porta tin di boso cu sa esaki caba pero pami e tawata un revelacion completo. Esnan cu conocemi bon sa cu mi ta gusta come berdura 'rauw' kermen sin hasa of herbe. Anto mi no tawata sa cu jambo bo por com'e curu! Wel, fresco for di e mata e ta hopi dushi y crunchi! Keremi cu e no ta 'baba' estilo di sopi jambo. Su textura ta manera un mix di paprika/courgette y hasa tambe e ta baha hopi bon. Ta existi un variant di okra color biña, mi ta en busca di esaki ainda! 

Salada di blachi di jambo

E flor di jambo

Tin caminda cu mi ta lesa cu bo por come e blachi di e mata di jambo estilo di sla of salada. Mi a purba un pida y mi smaakpalet unanimamente a renuncia e idea pa incorpora esaki den mi seleccion di cuminda. Ja, si bo no purba bo no sa (gniffel). Pero porta abo si lo gust'e? 
 

---

E flor tambe bo por come y tin restaurant cu ta uz'e como decoracion riba e tayo di cuminda cu ta wordo sirbi. Mi a come e flor, e ta smaak neutral kisas hasta un poco zoet. Pero mirando cu ta e flor ta percura pa mi haya jambo mi ta lagu'e para keto asina.

Un drinks..

For di e simiya di jambo (den estado hecho) nan ta traha un bebida similar cu e proceso di traha koffie. E simiya nan ta kime poco (roast) y mula esaki. Jambo a bira internationalmente conoci den temporada di guera mundial 2. Koffie lo a bira hopi schaars y hopi lugarnan tawata uza e simiya di jambo como substituto pa koffie. 

---

Salud

Research na brazil ta constata cu propiedadnan di okra ta yuda pa combati celnan di cancer (Monte, 2014). Tambe e bebida di e simiya di okra cu nos a caba di describi, ya pa añas ta ser uza door di Turconan como un remedi pa trata diabetico. Research di Thailand ta constata cu propiedadnan di Okra ta yuda pa trata 'Diabetes Mellitus type 2' (Thanakosai, 2013). 
Okra lo ta sumamente bon pa e revalidacion di neuronen celebral, asina un otro research na Thailand ta conclui. Nan a induci daño celebral serca ratonnan, e parti di e celebro cu ta regula entre otro memoria y abilidad di siña. Despues di a trata e ratonnan aki cu propiedadnan di okra a mira un regeneracion, pues un crecimiento of restauracion di e parti di celebro aki (Tongjaroenbanguam, 2011). Kisas den hende humano tambe e ta promove memoria y abilidad di siña.

Beyesa

Por ultimo, ta ser bisa cu Cleopatra tawata gusta come jambo! Sigun e reina di beyesa jambo ta contribui na un cuero saludabel, dus un cuero mas bunita! Y nos ta kere Cleo. Come jambo ta beneficioso pa bo salud, e ta contene vitamine A y C, hero, calcium, foliumzuur y mucho mas! 

Com'e bai goal, y si ainda bo mester mas rason pa come jambo; e ta low den caloria. Dus si bo kier baha peso, luci radiante y sintibo mas mihor den bo curpa, laga jambo bai weya. 

Laganos sa cu bo a gusta of aprecia e articulo aki, nos ta excited pa tende di boso, saludos!