Un Relato Personal: "Nos No Semper T'ey"

1/2/2025

Picture of a mom holding a new born child

Experencia traumatico di un 'first time mom' na hospital

E ta sinta mi dilanti. Mi cliente di awe a duna lus ni dos siman pasa. E ta contami su motibo pa busca ayudo psicologico. E relato aki ta uno personal y profundo, comparti directamente for di e cliente 'first time mom', cu ta conta su experencia na hospital y e desafionan cu e a enfrenta. Lesa pa descubri su historia y e lesnan cu nos por saca for di dje.

Mi prome parto a cuminsa diahuebs marduga 2am. Mi ta'tin contraccion 3 minuut leu di otro y dibaina mi por a cana. Mi a sigui e instruccionnan y a yama e number di emergencia y a haya e partero cu tabata na warda. Partero a bisami pa bay mi hospital y mi a sigui e instruccion aki.
Akinan ta unda mi parto traumatico a cuminsa.

Mi a yega hospital rond 3.30am y a haya un enfermera no muchu agradabel, e la ponemi na e monitor y despues di 10 min a bisami cu eno por haci nada pami paso mi contraccionnan tabata oneven (2min, 3min y 4 min, despues atrobe 4 min, 3min etc.) E la splica ami y mi pareha den un tono irita ki ora SO MAG yama e number di emergencia y bin hospital, nos a sinti cu e la insinua cu ami y mi pareha no sa ki ora nos mester bin hospital y cu nos a gasta su tempo, terwijl mi a splica e partera cu mino por para y cu e contraccionnan ta bin hopi liher tras di otro. Despues cu e la RANCA tur cos cu e la pega riba mi e la bisa nos “bay cas y wak si porta aki mainta bo ta bin bek”, tabata rond 4:40 a.m.
Mirando e experienca menos agradabel na hospital mi a opta pa warda 8:00 a.m. pa mi yama mi partera y puntra si nan por check si tur cos ta bon. Nan a contestami dibiaha y bisami bin dibiaha paso nan por a tende na mi stem mi tabata den HOPI dolor y ansha. Mi a bay partera, aki nan a bay toucheer mi, den e proceso a kibra mi awa y a mandami stret hospital.

Tur hende tin nan deseo di con nan lo desea di yega hospital y tambe tin nan parto, tin ta hasta haci birthplan, ami no tabata un excepcion. Mi a haci mi birthplan pero kedando cu e pensamento no ta semper cos ta bay manera bo kier. Mi a yega hospital mi a wordo pasa pa un Gyneacoloog Dr. Siemonsma (super amabel!) henter e proceso a tuma su tempo, pero mirando cu no tabata logrando pa yega e 10 cm y e baby a pupu, a opta pa un cesaria emergente, locual pa ta sincero mi no tabata mentalmente prepara pa bay FULL off, dus esey ta e comienso emocionalmente di mi parto traumatico. M'a desea pa tin e “golden hour”, pa tin e prome minuutnan miso cu mi pareha y e baby pero manera nos sa ora nan mandabo full off bo ta spierta despues di 2-3 ora.

Ora cu mi a sali di mi operacion, e realisacion cu mi a perde e prome ora nan di mi baby a dal emocionalmente duro, pa mi procesa esaki. Y pa despues di 30 minuut (orario di bishita di hospital a caba) nan a core cu mi pareha y famia, tabata un sla den cara. Mi a opta pa laga mi baby den babykamer pa 1 anochi pa mi logra sosega y procesa locual cu mi a caba di pasa aden. Claro esaki tabata dificil mirando nan ta bin lantabo pa remedi pa dolor, pa check presion, pa check sanger etc.

E siguiente dia mainta 8or nan a trece mi baby pami, 9or mi pareha por a drenta pa bin bishita, durante dia mentalmente y fisicamente mi tabata cansa / uitgeput si por discribi'e. Pa anochi 8pm atrobe nan a core cu mi pareha y mi tabata miso den un lugar cu no ta sinti comodo y cu mi prome baby.

Nada no a preparami pa e emocionnan cu mi lo pasa aden mi prome anochi. Mi tabata cansa, mentalmente procesando ainda e tristesa cu mi a sinti di henter e proceso di mi parto, mi tabata fisicamente den dolor y no por a move mucho sin wordo recorda di e corta cu mi haya. Mi no por a produci lechi ainda dus mester a duna formula (niks mis mee pero mino a plania pa esey), dus esaki a causa un stress y tristesa aserca. Mi enfermera tabata un señora di edad cu no ta'tin mucho pasenshi y gana di guiami of dunami un man cu su conocemento. Ora cu 3 ora a pasa y e baby a cuminsa yora y mi a primi e bel pa pidi pa un boter di lechi, e baby su yora a cuminsa zona mas duro y mi a panic y a bolbe primi pa ayudo. E enfermera a drenta y bisami cu mino mester primi e bel asina hopi biaha y cu porta mi mester pega e baby na pecho (mi a primi 3 biaha, 2 biaha hunto per ongeluk).
M'a bise cu mino a produci lechi ainda dus mi mester haya un boter cu formula pa e baby bebe, e la bisami 'sigur bono kier purba di pone na pecho?'. Durante e combersacion aki e yoranan/ gritonan a cuminsa bira mas pisa y e la ripara esey y a djis para bandi mi y cuminsa bisami e beneficionan di duna lechi di pecho. Mi honestamente no tabata sa kico pa contest'e, ni cu ki mirada mi mester a wak e.

Mi a insisti p'e trece un boter di lechi y porfin despues di casi 20 min e la bay y bin trece un boter. Despues di e boter di lechi, mi baby no kier a drumi. E la djis keda yora, mi a saka su gas, mi a cambia su pampers y mi a keda tene... pero nada no a stop e di yora. Mi a bolbe primi e bel pa pidi pa conseho/ tips cu por yuda pa calm'e, pa mi bolbe haya e enfermera bisando mi lechi pecho porta lo yuda. Mi a perde pasenshi y a conteste cu mino a pidi su opinion over di e voeding di mi yiu, mi a pidi pa si tin algo porta cu mi no sa por ta molestia e baby, y m'a bise cu si eno tey yudami mi ta desea pa bay cas, mi ta firma cualkier papeleo pa mi bay cas paso eynan mi sa mi lo haya e ayudo fisico, mental y emocionalmente cu mi tabata mester di dje e momento ey. E la bisa algo bou su rosea y a cana bay, e anochi ey mi a opta pa no primi e bel mas pami mes, maske mi tabata mester un paracetamol pa mi dolor y a opta pa djis primie (cu miedo) despues di 3ora pa e baby por a haya su lechi, mi a keda lanta desde 2am te 8am pa warda ora mi pareha yega. Durante e 2am - 8am e baby a drumi y lanta y a yora bay off, cierto rato mi mes a yora cune di desesperacion, cansancio, dolor y tristesa cu mi tabata sinti na e momento ey.

E prome anochi a traumami asina hopi cu e la afecta y ainda tin afecto e prome 2 simannan di mi baby su bida, cualkier rato cu e tabata yora mi tabata bay bek na e anochi cu mi a sintimi asina desespera y asina hopeloos y mi so.

Contando mas familiar nan vooral hende nan di mi edad nos a yega na conclusion cu tin mas hende ta sali sea trauma of desgusta cu e trato cu nan ta ricibi na hospital y esaki ta algo hopi alarmante.

Mi tabata den mi momento mas vulnerabel, mentalmente mino tabata na mi mihor nivel, mi a pidi pa ayudo y mi ta sinti cu mi a wordo neglisha. Mi a manda hospital un mensahe cu mi experienca, mi a papia na telefoon cu un persona cu tampoco no tabata mustra interes, dus awe mi kier comparti cu boso mi propio experencia, sperando pa un cambio pa e siguiente mami haya e amor, sosten, cariño, comprension cu e ta merece den momentonan cu “mester” ta bunita, trankilo y agradable.

5 Comments

Bethsarim link

1/3/2025 08:53:24 am

Ta un problema structural di hopi anja. E actitud cu "bo no sa kico bo ta sinti" ta uno hopi prevalente, y asina ta e mama ta wordo ignora y trata di un forma unfair, dañino y dehumanisante.

Mi prome jiu tin 15 caba y tin hopi momento cu mi tambe a biba como mama den proceso di haya jiu na hospital na Aruba cu a laga hopi di desea.

E ta hopi desapuntante ora esaki sosode mientras bo a tin complicacion tambe. Pasobra bo echt tabatin mester di cuido y atencion empatetico di e staff medico.

Na diferencia, ami no tataba tin mester di procedura medico, djiss espacio pa duna lus na pas. Pero mi a hayami ta pleita, discuti y argumenta pa por scucha mi curpa y duna lus mane mi tabatin mester. Hopi stress innecesario.

Den mi caso ma experencia trauma na man di e kraamverpleegkundige durante pa sin complication.

Loke a pasami den hospital a pone cu ami a stop di bay duna lus na hospital y mi a bira net un Leon cu ta gruña pa su derecho di duna lus na un forma digno.

1. Enfermera cu ta bin prohibimi di pusha, cu mi no sa si mi curpa ta cla y cu mi ta bou obligacion pa warda partera of gyneacoloog na warda yega. Na un forma agresivo y denigrante.

2. Durante un parto di ya caba 3 ora e dos enfermera cu tabata atendemi a cuminsa discuti si mi a habri 7 of 10 cm, dilanti mi. Tur dos a toucheer repetidamente sin cominica cu mi y un a dicidi di termina e discusion dor di kibra mi vlies sin comunica cu mi.

Un acto cu ta califica como asalto, mientras ami tabata ful bij y mi mester a wordo envolvi, mester a comunica cu mi. Punt uit.

Mi sa cu parto no ta bay mescos tur biaha, pero mi lo tabata kier sinti mas scucha y cu tin confiansa den mi habilidad como ser feminino humano pa por indica kico ta pasando den mi curpa.

E ta lamentable cu ainda ta tuma lugar trato asina baho di mama den nan momentonan mas vulnerable y dificil.

Raquel

1/3/2025 03:54:52 pm

Jammer!

Ami no a experiencia esaki at all....

Tur nurse ta diferente. Algun mas strak cu otro, pero ami no a sinti fastioso niun momento.

E parti di core bo pareha... Ta regla cu 8or tur hnd mester bandona hospital. Dus esei ta gewoon regla.

Y e parti di pone baby na pecho, ta berdad. Bo mester pone chupa pa baha e lechi. Tin hnd ta haya lechi prome cu otro. Ami mes a tarda basta. Ma haya hopi dolor ora ela actually baha paso mi pechonan tbt mane baranca. Pero cu tur 2 yiu mi a pone nan chupa pa bahe.
Mi a research esaki delanta, dus prome cu nan ora di bebe yega, ya mi a pone nan na pecho pa cuminsa chupa. Pa asina purba baha e lechi prome cu e baby perde pasenshi y grita histerico.

Mi prome baby no a tuma e formula at all dus mi a keda pone na pecho constant. Mi di 2 yiu si a saboria e formula despues cu ma pone na pecho.

Tur baby ta diferente. Danki Dios cu mi babynan no tbt yora histerico pornada. Paso esei berdad por ta hopi pisa.

Again jammer cu ba sinti cu e trato no tbt bn. Ami si no tin nd di keha.

Gilienne

1/4/2025 01:14:33 am

Min por gaña mi experience a bay basta bon cu e nursenan pero dimes tin hopi personalidad differente.

Locual si mi a ripara ta cu hopi ta underestimate first time moms basa riba old teachings cu first time moms ta tarda hopi pa progressa ora nan ta in labor y pesey ta manda cas mayoria bes.

Tambe cu tur tin differente tips y opinion paso nan ta keda cambia shift. Ami mes nan an encourage mi keda purba cu pecho y mi hacie pero dsp mi baby su peso a drop y mi mester a keda te ora e bisa bek y un di nan a bisami mihor ma dune boter tmb ….. letterlijk nada ta bon… si Bo Duna pecho no ta bon, si Bo no Duna pecho tampoco no ta bon… gwn esey si e irritant paso cada bes nan cambia shift nan ta bisami algo differente hasta cu twt mi di 2 yiu. Y ora nan bisami algo mi ta bisanan si mi tin yiu caba y nan ta stop di bisa opinion. 1 di nan a hari paso mi a bay cu maleta ma bise bosa masha bn ta paso mi ta bay opera y mi prefera transport tur cos den un solo maleta enbes carga yen tas pa bay auto dia mester bay cas cu baby…

Lev

1/4/2025 05:56:36 pm

I guess it really depends on who you have at your bed at the time. My traumatic birth stories stem from my treatment in the Netherlands. Both in a hospital and in a verlos hotel. So when it came to giving birth here on Aruba I already had a backpack of issues with me. However I received the best care here I could ask for. From nurses and midwives. It heald some of the wounds I still had from my previous births. I was listed too, communicated with and helped regain composure when I lost my s@#$ because of the pain. Even though I gave birth during covid my husband didn't feel like he was made to leave or anything. In the contrary everybody did their best to make the experience as beautiful as the circumstances would allow.
But back to the article, it is awsome that you guys are shining a light on post partum mental health! Super important!

Papa

1/4/2025 08:07:21 pm

Mita compronde e situacion aki, Door cu mi pareha tambe a pasa den un situacion parecido. Ora cu nos a yega hospital cu e casi no por a cana door di su contraccion nan. Tambe a wordo manda cas den un manera fucking fresko! Door di e nurse cu a atende nos. Abo como nurse trahando den e afdeling ey bo supose di sa cu un muhe cu ta casi haya yu ta pasando den hopi dolor y cu hopi emocion. Nos a wordo manda cas bek dibiaha paso supuestamente e contraccion nan twt lew di otro. E nurse no a ni toucheer e siendo cu partero a bisa cu e mester a wordo toucheer. Ora cu nos a subi auto bay cas, nos a mira e mesun nurse aki subi su auto y bay tambe. Kisas e ta pura pa bay cas y lubida ki tipo di trabou eta traha???? E nurse aki minota corda su nomber paso sino lo ma pone akiriba tambe.
2 ora despues ja caba nos a bay bek hospital paso e contraccion nan a bira dimas y dimas. Ora a yega hospital atrobe a wordo toucheer y e twt 5cm caba, dus porta cu nos no mestera wordo manda cas mes na e prome instante???
Despues di e parto siguiente dia, mi pareha mestera keda interna door di sierto complicacion nan. Mainta trempan un nurse cu kisas no a drumi bon y ta lubida ki tipo di trabou eta traha, a drenta den e kamber cumisa zundra pa turcos cu un style hopi fresko. Esaki sin sa den ki estado mi pareha a keda despues di e parto. Akinan un otro nurse a drenta y splika e nurse cu gusta zundra, cu mi pareha ta interna door di complicacion nn y cu pesey eno por move masha. Eora e nurse cu gusta zundra a relax. Eynan por mira caba cu ela yega drenta kamber actua di tal manera desagradabel SIN buska pa sa den ki estado e patient ta prome cu actua asina.
Aki ta laga un sentimento hopi fies den e mama y e tata cu ta purba di sigi instruccion nan pero ta wordo trata mane cu ta stroba nos ta stroba e bida di e nurse nan. Kisas e nurse nan aki tin cu haya un refreshment di loke nan a sinja pe of buska un otro profeshon y wak cu si e style fresko fies ey lo beneficia nan.
Den kinderafdeling tambe tin un set di appelputri cu ta trata hende manera cu ta stroba nos ta stroba nan di sinta klets. No por papia cu hende na manera drechi y tampoco tin comprenshon pa e situacion di hende cu a cabi haya yu.

Twtin un birthplan pero no a hou rekening cu nada nada di esaki. Turcos a bay manera cu nan so twt kier.

Sigur cu tin nurse nan cu ta hasi nan trabou y trata e hende nan hopi bon! Nos ta aprecia e nurse nan ey cu sa ki tipo di trabou nan ta hasiendo. Pero den otro banda tin VARIOS cu sea a lubida of perde smaak den nan trabou y ta bin trata hende con cuta den un situacion cu por ta delicado.
Aki nan nos ta na Aruba, nos ta trata otro manera hende como debe ser. Dus no bin compara Aruba cu otro pais mes.
Si tin algun nurse cu ker bin papia cumi direct tocante esaki djis lagamisa y nos ta cambia poco idea cu otro.

BLOG

Un Relato Personal: "Nos No Semper T'ey"

Experencia traumatico di un 'first time mom' na hospital

Leave a Reply.

Author

Archief